Zi taddart n « Saliki Tawmat » gi Tânja, ifghed udellis amezgaru n uzrawi Oebdelleh El Mancuri s ij n yisem iccat ghar ragwaj d radjagh n tudart : « Imettâwen n tamja ».
Taghewwint-a usefru issughel-it ghar Tafransist uselmad dduktur Mohammed SERHOUAL, manaya h’uma ad innurzem udellis-a x tasekla n midden, u oawed ad yewc abrid i wsugher ghar yersawen nneddên.
Oebdelleh Lmancuri, amak id yusa x uorur udellis, irur gi Tamasint (Lhusima) deg 1963, idfar tighri ines tamezgarut gi Tamasint, zi ssin immuti ghar llisi n Imzuren, maca ggin-as deg ubrid imxumbar it gha yejjen ad immuti ghar Tânja bra m ad yeksi Tabakaluryat. Gi tendint n Tânja « ur ijji rxedmet ur iggi », maca asmuni ines n tghewwint (nigh tâsmut-a amak yeqqar netta) n izran ig yedjan d-rxedmet « ig yegga d-tameqrant ». Asufegh ines i wsefru-a amezgaru itased h’uma « ad issemghar zges ixef fines d imeddukwar ines mig ked ighra, d tusna ines tamazight ».
H’uma anessars imsijjan zdat i min dyusin deg tghewwint n Oebdelleh Lmencuri, aqakum -dani s wadday- ict zi "tqessisin" ig yewcin isem i wdellis-a qqao, u nettat itedfâr-it-id usughel id-as yegga Mohammed Serhoual ghar Tafransist.
Nessitim i wumatnegh Oebdelleh Lmencuri ssehh’et d rehna, u netrâja zges oad attâs n tefray id gha yejj zi ssa d tsawent.
!Oad ghari dani tadewra
Munoim Azegza
Aghbar : imezran.org
tasufghitI meta wen n TamjaTeftuttusen wussan-inu,
Ttâwen am bumarghud,
Ig iketsi wadû.
Tfawt tugi ad tessij.
Tadjest tarennu.. tarennu..
Tawengint tessara-d amadâl,
Tufi-t oad isneddu.
Aghi ur dag-s teswi.
Trussi ur dag-s tecci.
Ma dhen yudjegh yudjegh yendu.
Yusi-d kid-ek wareq-inek,
Ammi-s n tmurt-inu.
Yebsisseq-ak ughembub,
Arrimet-inek tetcirru,
Maca aar-d x useqsi-a:
Swizzêd s ufus-inek.
Mmer-ayi mani yedja
W-areq-inu?
Tamment ur- t itegg Yizi.Tazriwin nebra y-axemmem,
Tawyent-id anedref.
Aredrent min d yuryen.
Arennunt asendef.
Tifri mara tekna,
Aghiras ur Ghar-s may-s t-gh ad yattef
Ma tikri tafaryat,
Deg wqemmum-ines draddef.
Am wen yucin 3ewwam i wayer.
Netta ur yessin ad yefdeh.
Am wen yexsen ad idu.
Afriwen 3ad ur ten-d yesserqeh.
Ijj n uxezzar d azegrar,
Ghar ragwaj yeggur itadef.
Ma wen yetxezzaren ak idaren,
Yetghimma lebda yunef.
Am wen yetghiren qa yewwed ajenna.
Netta x idurar,
I tneqdi3 ireddeh.
Am wen yurjan qa netta d ttajar.
Udfent-t icu3ad.
Wami xe-s-d yarkeb "sbeh"
Idammen n YezranIdammen-inu tnessisen,
Tazren d ighezran.
Tsiyyafen timura.
Temghen d iseqsan.
Gi tudart n yeffuden,
Yemmi tazren izewran.
Idammen-inu tcacuren
Am ighubar n waman.
Ssexsayen timessi,
Yetnekkaren deg ixsan.
Ssagwaren isegnuten,
N yesbakinen ijenwan.
Idammen-inu tfewwaren
Tmuden d ifiran.
ttawen gi re3win.
Arennun tu3ran.
Tagren ghar yetran.
D izekkunen n yezran
Tisemmamin.Tejjid min yejjan inek
Teksid min yejjan n midden
Ur ye3jib wur inek
Ur d-ak wdin ifadden
Ssirden ak tawngint
Deg Wajji inek 3ejnen
Sweddaren ak ramqibat
Ur-c ksin. ur-c ssarsen
Sremden ak "3ali Baba
D areb3in n icafarren"
Ssettun ak Timezgha
D min dag-as ighemyen
Teqqimed d abujir
Am uhebbi jar asen
Temsighed zi wa ghar wa
Am wen iweddaren deg ijdi
Ur ghar-s buyegmiren
Ad te3qbed teggamid
Ad tarnid d inughen
Thajit inek am ubagher
Ira yezzikiden
Yegga tikri n tsekkurt
Ffareyden as idaren
Asitem n Ih'enjirenNecnin d ihenjiren
Necnin d imazyanen
Necnin d agheddu n nwar
Yetne3ni3 x trelli
Awar-nnegh yizid
Am wawar n yejdiden
Netghannaj x trelli
Char ma suden isemmiden
Tinutin.Qqa3 min d-ayi teqqar-d
Snegh ira yegga
Snegh ira ass-a
Ad yedwer d tudecca
Snegh ira tara
Tcar s timeqqa
Maca min ghad -yegga
Wen d yurin itnekkar-iwetta?
Marma yenna-s qa yewwed
Itaf 3ad yessenta
Am wen Yegguren x uhidar
Tudart teqqar-as deghya!
Am wen yarezzun x tidet
Netta ta3yar tanufra
Taghuyit n TmurthMara qqimen waman
Tazren d ibarwayen
Ur ten isess ghir yejjen
Marra ad g-s kken
Mara wwin-d ci ukecca
Marra ad t-sregden
Wen yessagwajen axezzar
Ma am wen t-yessadasen
Wen izar3an asennan
Ma aw wen tèifarnan
Tammurt tehrek tnehhek
Tetru d imattawen
Ifassen ines ghar ujenna
Tezzijjiz i isegnuten
Tseqsa x itran
Mayemmi rahen arakben?
Tassitim tifawin
Gi tadjest n yessaren
Tammurt tuher tessuhrut
Teffud inessisen
Ad azren ighezran
Ad azren iseghuyyiwen
Ad iken waddud nni
Ira yeffariden
Ad temmuyda tudart
Ad smumgen isgmiten
Tammurt tseqsa teqqar
Ma dinni ci ixemmimen?
Ma dinnici uxezzar
Ghar itran n yareqqen?
Ad teddarmin-t gh-ad yesfaden
Ur jji lin-t gh-ad yesfaden
Ad temsagar
Ag min-t ghad yejjen
Tifeqqeht n TesritTasrit tegga tameghra,
Traja wi-t gh-ad yessenyen.
Ayt-bab n taddart tsen,
Ighardayen execxucen.
Yeqqim useqsi yeger.
Mkur ijj mani idarren.
Waxxa mummu yezra,
Abrid yessufughen.
Mkur mani ijebbed;
Ci ghar teksart, ci ghar usawen.
Tasrit tedwer tibenghart.
Teswa deg imettawen
Anexsis x unexsis,
Tenqetmar s ixemmimen.
Taqenfit x tqenfit,
Tesruba urawen.
Gi tagest n yessaren,
Tfetteh deg iseqsiten.
Tettar ad tgar tfuyt,
Ataf wi-t gh-ad yessenyen.
Char n ibriden,
Yehnunden x izargawen?
Ratar ines yessuref,
Tar wen yessufughen.
Qa mummu mara yendi,
X wudem n izeryawen.
Ad yeddar d afutix,
Deg wur n Ixemmimen.
Qa c-inet useghdiSsiwer
Arzem tawenghint-inek
fsi iceddan zeg ur-inek
qa t-tejjed yesneddu
ad tigh ad tezrad ci n tgha
ad yessuref udar
ad yennarwer usegnu
ini sqad timenna
aked re3win n ujenna
qa ten tejjed
gi tisi n wanu
qa wussen-inek 3eddan
ttawenam bumarghud
ig yektsi wadu
arzem aqemmum-inek
i wawar d acemrar
sqad-it d tisugar
d isufar i wsegmi
mara yetru
d qwaru-nni i3eddan
jar n yewdan
issesmid urawen
am re3win n unabdu
ssiwer! ..ini..
seffed x wudem n tudart timeggi
qa aseghdi d raxat
itfafa ineqqit
netta 3ad d agheddu
Subject: Imettawen n tamja 
Sun 23 Aug - 17:57
